“Milli Mətbuat 150 – Rəqəmsal erada gənclər və media savadlılığı” layihəsi çərçivəsində Biləsuvar və Masallı rayonlarında gənclər üçün maarifləndirici görüşlər təşkil olunub. Layihənin əsas məqsədi gənclərin informasiya mühitində daha şüurlu, tənqidi düşüncəyə malik və məsuliyyətli istifadəçi kimi formalaşmasına dəstək vermək, eləcə də milli mətbuatın zəngin irsini müasir çağırışlar fonunda təbliğ etməkdir.
Görüşlərdə peşəkar jurnalistlər və tanınmış televiziya aparıcıları iştirak edərək rəqəmsal dövrdə informasiya savadlılığının əhəmiyyəti, düzgün və etibarlı məlumatın seçilməsi, dezinformasiyanın tanınması, sosial mediada məsuliyyətli davranış və etik media prinsipləri barədə ətraflı çıxışlar ediblər. Tədbir iştirakçıları real nümunələr üzərindən xəbər mənbələrinin yoxlanılması, faktların dəqiqləşdirilməsi və informasiyanın ictimai rəyə təsiri kimi mövzularla tanış olublar.
İnteraktiv formatda keçən görüşlər zamanı gənclərin sualları cavablandırılıb, müzakirələr aparılıb və media sahəsində karyera imkanları barədə faydalı məlumatlar paylaşılıb. Xüsusilə, rəqəmsal platformalarda yayılan informasiyanın sürəti fonunda məsuliyyətli paylaşım mədəniyyətinin formalaşdırılmasının vacibliyi vurğulanıb.
Layihə çərçivəsində keçirilən bu görüşlər gənclərin media savadlılığının artırılmasına, onların informasiya təhlükəsizliyi və etik dəyərlər barədə biliklərinin möhkəmləndirilməsinə mühüm töhfə verib. Eyni zamanda, milli mətbuatın 150 illik yubileyi münasibətilə media tariximizin inkişaf yolu və bu sahədə əldə olunan nailiyyətlər də diqqətə çatdırılıb.
Qeyd edək ki, “Milli Mətbuat 150 – Rəqəmsal erada gənclər və media savadlılığı” layihəsi ölkənin müxtəlif regionlarını əhatə etməklə gənclər arasında maarifləndirmə işlərinin genişləndirilməsini və media savadlılığı sahəsində davamlı fəaliyyətlərin qurulmasını hədəfləyir.
