“CareerLAB” şəbəkəsi çərçivəsində Azərbaycan Universitetində təşkil olunan tədbir gənclərin fəal iştirakı ilə uğurla baş tutub. Layihənin əsas məqsədi tələbələrin karyera inkişafını dəstəkləmək, onların əmək bazarına daha hazırlıqlı şəkildə inteqrasiyasına töhfə vermək və müxtəlif sahələr üzrə maarifləndirici mühit yaratmaq olub.
Tədbirin açılış hissəsində çıxış edən rəsmi qonaqlar layihənin əhəmiyyətindən bəhs edərək bu cür təşəbbüslərin gənclərin şəxsi və peşəkar inkişafında mühüm rol oynadığını vurğulayıblar. Onlar sosial iş sahəsinin müasir dövrdə актуallığını qeyd edib, tələbələrə gələcək karyeralarını daha düzgün planlamaq, bilik və bacarıqlarını davamlı inkişaf etdirmək istiqamətində dəyərli tövsiyələr veriblər.
Daha sonra “Sosial iş sahəsində karyera planlaması” mövzusunda panel müzakirəsi təşkil olunub. Panel zamanı iştirakçılara sosial iş istiqamətində mövcud karyera imkanları, bu sahədə uğur qazanmaq üçün tələb olunan əsas bacarıqlar və inkişaf perspektivləri barədə geniş məlumat təqdim olunub. Mütəxəssislər öz peşəkar təcrübələrini bölüşərək real nümunələr əsasında mövzunu izah edib, eyni zamanda iştirakçıların suallarını cavablandırıblar.
İnteraktiv formada keçirilən panel müzakirəsi gənclərin mövzuya marağını daha da artırıb və onların gələcək karyera seçimlərinə müsbət təsir göstərib. Tədbir iştirakçılara həm nəzəri biliklər, həm də praktiki yanaşmalar baxımından faydalı olub.
Qeyd edək ki, “CareerLAB” şəbəkəsi Gənclərin İnkişaf və Karyera Mərkəzinin təşkilatçılığı ilə, Azərbaycan Respublikasının Gənclər Fondunun, Azərbaycan Universitetinin Karyera İnkişafı Departamenti və Universitetin Tələbə Gənclər Təşkilatının tərəfdaşlığı ilə həyata keçirilib. Layihə çərçivəsində gələcəkdə də bu kimi tədbirlərin davam etdirilməsi planlaşdırılır.
