Gənclərin İnkişaf və Karyera Mərkəzinin həyata keçirdiyi Səyyar Gənclər Xidməti layihəsi bu dəfə Şamaxı rayonunda təşkil olunub.
Proqram çərçivəsində gənclər müxtəlif istiqamətləri əhatə edən maarifləndirici sessiyalarda iştirak edərək bilik və bacarıqlarını inkişaf etdirmək imkanı əldə ediblər. Sessiyalar zamanı iştirakçılara müasir dövrün tələblərinə uyğun bacarıqların formalaşdırılması, şəxsi inkişaf və peşəkar hazırlıq istiqamətində faydalı məlumatlar təqdim olunub.
Təhsil və karyera imkanları, rəqəmsal bacarıqlar, sağlam həyat tərzi, vətənpərvərlik və yaradıcılıq mövzularını əhatə edən fəaliyyətlər gənclərin həm nəzəri biliklərini artırmağa, həm də praktik bacarıqlar qazanmalarına şərait yaradıb. İştirakçılar müxtəlif təqdimatlar, interaktiv müzakirələr və komanda fəaliyyətləri vasitəsilə yeni təcrübələr əldə ediblər.
Sessiyalar zamanı gənclər əmək bazarında tələb olunan bacarıqlar, rəqəmsal texnologiyalardan səmərəli istifadə, sağlam həyat tərzinin əhəmiyyəti və yaradıcılıq potensialının inkişaf etdirilməsi ilə bağlı məlumatlandırılıblar. Bu fəaliyyətlər onların sosial fəallığının artırılmasına və şəxsi inkişafına dəstək göstərməyə yönəlib.
Səyyar Gənclər Xidməti layihəsinin əsas məqsədi region gənclərinin inkişaf imkanlarına çıxışını genişləndirmək, onların bilik və bacarıqlarını artırmaq, eyni zamanda müxtəlif sahələr üzrə maarifləndirici və inkişafyönümlü fəaliyyətlərə cəlb olunmasını təmin etməkdir.
Gənclərin İnkişaf və Karyera Mərkəzi regionlarda yaşayan gənclərin potensialının üzə çıxarılması və onların hərtərəfli inkişafının dəstəklənməsi istiqamətində fəaliyyətini davam etdirir.
